ಬೆಂಗಳೂರು: ಬಸ್ ನಲ್ಲಿ ಪ್ರಯಾಣಿಸುವ ವೇಳೆ 1 ರೂಪಾಯಿ ಚಿಲ್ಲರೆ ನೀಡದ ಕಂಡಕ್ಟರ್ ನಡವಳಿಕೆಗೆ ಅಸಮಾಧಾನ ವ್ಯಕ್ತಪಡಿಸಿರುವ ಕೋರ್ಟ್ ನೊಂದ ಪ್ರಯಾಣಿಕನಿಗೆ 3 ಸಾವಿರ ರೂಪಾಯಿ ಪರಿಹಾರ ಕೊಡುವಂತೆ ಆದೇಶಿಸಿದೆ.
ಬಿಎಂಟಿಸಿ ಬಸ್ ನಲ್ಲಿ ಪ್ರಯಾಣಿಸುವ ವೇಳೆ ಕಂಡಕ್ಟರ್ ತನಗೆ 1 ರೂಪಾಯಿ ಚಿಲ್ಲರೆ ವಾಪಸ್ ನೀಡಿಲ್ಲ ಎಂದು ಆಕ್ಷೇಪಿಸಿ ವಕೀಲ ರಮೇಶ್ ನಾಯಕ್ ಗ್ರಾಹಕ ಕೋರ್ಟ್ ಗೆ ದೂರು ಸಲ್ಲಿಸಿದ್ದರು.
ದೂರಿನ ವಿಚಾರಣೆ ನಡೆಸಿದ ಬೆಂಗಳೂರಿನ 4ನೇ ಹೆಚ್ಚುವರಿ ಗ್ರಾಹಕ ವ್ಯಾಜ್ಯಗಳ ಪರಿಹಾರ ಆಯೋಗ ದೂರುದಾರರಿಗೆ ತೊಂದರೆಯಾಗಿದ್ದಕ್ಕೆ 2 ಸಾವಿರ ರೂಪಾಯಿ ಪರಿಹಾರ ನೀಡುವಂತೆ ಆದೇಶಿಸಿದೆ. ಹಾಗೆಯೇ, ಕೇಸ್ ವೆಚ್ಚವಾಗಿ 1 ಸಾವಿರ ರೂಪಾಯಿ ಪಾವತಿಸುವಂತೆ ತಿಳಿಸಿದೆ.
ದಂಡದ ಮೊತ್ತವನ್ನು 45 ದಿನಗಳಲ್ಲಿ ನೀಡಬೇಕು ಇಲ್ಲದಿದ್ದರೆ ವಾರ್ಷಿಕ ಶೇಕಡಾ 6 ರಂತೆ ಬಡ್ಡಿ ಅನ್ವಯವಾಗಲಿದೆ ಎಂದು ಗ್ರಾಹಕ ನ್ಯಾಯಾಲಯ ಆದೇಶಿಸಿದೆ.
ಪ್ರಕರಣದ ಹಿನ್ನೆಲೆ: 2019ರ ಸೆಪ್ಟೆಂಬರ್ ನಲ್ಲಿ ದೂರುದಾರರಾದ ವಕೀಲ ರಮೇಶ್ ನಾಯಕ್ ಬಿಎಂಟಿಸಿ ವೋಲ್ವೊ ಬಸ್ ನಲ್ಲಿ ಶಾಂತಿನಗರದಿಂದ ಮೆಜೆಸ್ಟಿಕ್ ಗೆ ಪ್ರಯಾಣಿಸಿದ್ದರು. ಈ ವೇಳೆ 29 ರೂಪಾಯಿ ಟಿಕೆಟ್ ಗೆ 30 ರೂಪಾಯಿ ಪಡೆದಿದ್ದ ಕಂಡಕ್ಟರ್ 1 ರೂಪಾಯಿ ಚಿಲ್ಲರೆ ಹಿಂದಿರುಗಿಸಿರಲಿಲ್ಲ.
ಕಂಡಕ್ಟರ್ ಚಿಲ್ಲರೆ ನೀಡದ ಕ್ರಮ ಪ್ರಶ್ನಿಸಿ ನಾಯಕ್ ಗ್ರಾಹಕ ನ್ಯಾಯಾಲಯಕ್ಕೆ ದೂರು ಸಲ್ಲಿಸಿ 15 ಸಾವಿರ ಪರಿಹಾರ ಕೋರಿದ್ದರು. ಅರ್ಜಿ ವಿಚಾರಣೆ ವೇಳೆ ವಾದ ಮಂಡಿಸಿದ್ದ ಬಿಎಂಟಿಸಿ ಇದೊಂದು ಚಿಲ್ಲರೆ/ಕ್ಷುಲ್ಲಕ ಪ್ರಕರಣವಾಗಿದ್ದು ವಜಾಗೊಳಿಸಬೇಕು ಎಂದಿತ್ತು.
ವಾದ ಪ್ರತಿವಾದ ಆಲಿಸಿದ ಗ್ರಾಹಕ ನ್ಯಾಯಾಲಯ ವ್ಯಾಜ್ಯ ಕ್ಷುಲ್ಲಕ ಎನ್ನಿಸಬಹುದು. ಆದರೆ ಇದು ಗ್ರಾಹಕರ ಹಕ್ಕಿನ ವಿಚಾರ. ಅರ್ಜಿದಾರರ ಪ್ರಯತ್ನ ಮೆಚ್ಚುವಂತದ್ದು. ಹೀಗಾಗಿ ದೂರುದಾರರು ಪರಿಹಾರಕ್ಕೆ ಅರ್ಹರಾಗಿದ್ದಾರೆ ಎಂದು ಅಭಿಪ್ರಾಯಪಟ್ಟು ಪರಿಹಾರ ಪಾವತಿಸುವಂತೆ ಆದೇಶಿಸಿದೆ.